पूर्व नगर प्रमुख शिवाकोटी मुछिएको जबरजस्ती करणी मुद्धाको बकपत्र सुरु
झापा । बिर्तामोड नगरपालिकाका पूर्व नगर प्रमुख ध्रुवकुमार शिवाकोटीविरुद्ध जाहेरी दिएका जाहेरीवालाहरुसंग आज झापा जिल्ला अदालतमा बकपत्र गरिएको छ ।
पीडित नाबालिका र अर्का जाहेरीवालासंग आज बकपत्र गरिएको अदालतका श्रेस्तेदार किरणकुमार सिंहले जानकारी दिए । जाहेरीवालाका तर्फबाट अब दुईजनाको बकपत्र लिन बाँकी रहेको छ । जाहेरीवालाका तर्फबाट बाँकी दुईजना साक्षीको भोलि बकपत्र गरिने जनाइएको छ । जाहेरीवालाको बकपत्र सकिएपछि पीडक पूर्व नगर प्रमुख शिवाकोटीसंग बकपत्र गरिने भएको छ ।
चैत ११ गतेदेखि बकपत्र शुरु गरिने अदालतले पत्र पठाएको थियो । तर हिजो सक्कली मिशिल नभएका कारण बकपत्र शुरु हुन सकेन । सक्कली मिशिल उच्च अदालत इलामबाट झिकाएर आजदेखि बकपत्र शुरु गरिएको अदालतका श्रेस्तेदार सिंहले जानकारी दिए । झापा जिल्ला अदालतले थुनामा राख्न दिएको आदेशविरुद्ध शिवाकोटीले उच्च अदालत इलाममा पुनरावेदन दिएका थिए । उच्च अदालतले चैत ७ गते सक्कली मिशिल पेश गर्न आदेश दिएपछि चैत ८ गते लगेर त्यहाँ बुझाइएको थियो
कारागार चलानको अदालती आदेशपछि पनि करिब तीन महिनादेखि बीएण्डसी अस्पतालमै रहेका बिर्तामोड नगरपालिकाका पूर्व नगर प्रमुख शिवाकोटीलाई हिजो अदालतमा पेश गरिएको थियो । जाहेरीवालाहरुको बकपत्र सकिएपछि शिवाकोटीलाई बकपत्रका लागि फेरि अदालत लगिने भएको छ ।
गत पुष २२ गते झापा जिल्ला अदालतले शिवाकोटीलाई पुर्पक्षका लागि कारागार चलान गर्ने आदेश दिएको थियो । आदेशमा अस्वस्थ्य रहेका शिवाकोटीको उपचारको व्यवस्था मिलाउनसमेत भनिएको थियो । त्यही आदेशबमोजिम झापा कारागारले उनलाई बीएण्डसी अस्पतालमा रहेर उपचार गर्न दिएको हो । उनको स्वास्थ्यमा धेरै सुधार आएकाले केही दिनअघि झापा कारागारका प्रमुख रेवन्त भट्टराईले कारागार पठाउने बताएका थिए । तर अझैसम्म उनलाई बीएण्डसी अस्पतालमै राखिएको छ ।
घरेलु कामदारको रुपमा राखिएकी १६ वर्षीया नाबालिकालाई जबरजस्ती करणी गरेको आरोपमा बिर्तामोड नगरपालिकाका पूर्व नगर प्रमुख शिवाकोटी गत मंसिर २४ गते पक्राउ परेका थिए ।
