झापाली समाज अमेरिकाको पहलमा विद्यार्थीले पाए छात्रवृत्ति, सहकारी संघले घोषणा गर्यो एक करोडको कोष
बिर्तामोड । अमेरिकामा बसोबास गर्ने झापालीहरुको साझा संस्था झापाली समाज अमेरिकाको अग्रसरतामा झापा जिल्लाका सामुदायिक विद्यालयमा पढिरहेका विद्यार्थीलाई छात्रवृत्ति वितरण गरिएको छ ।
मंगलवार बिर्तामोडमा ‘भविष्यका कर्णधार छात्रवृत्ति वितरण कार्यक्रम’ आयोजना गरेर उक्त समाजले जिल्ला सहकारी संघ झापा र झापा विकास मञ्च काठमाडौंको सहकार्यमा विद्यार्थीलाई छात्रवृत्ति प्रदान गरेको हो ।
झापाका सामुदायिक विद्यालयमा अध्ययनरत विपन्न एवं जेहेन्दार विद्यार्थीलाई तेस्रो वर्षको कार्यक्रमअन्तर्गत छात्रवृत्ति प्रदान गरिएको कार्यक्रममा बताइयो ।
शिक्षा विकास तथा समन्वय इकाईका जिल्ला प्रमुख राजकुमार विकको प्रमुख आतिथ्यमा भएको कार्यक्रममा जिल्लाका विद्यार्थीलाई छात्रवृत्ति प्रदान गरिएको थियो ।
सो अवसरमा छात्रवृत्ति पाउने विद्यार्थी, उनीहरु पढ्ने विद्यालयका शिक्षक र अभिभावकहरुको समेत सहभागिता थियो । झापाली समाज अमेरिकाले एउटा महत्वकांक्षी छात्रवृत्ति कार्यक्रम अन्तर्गत ‘एक व्यक्ति, एक विद्यार्थी’ नामक अभियान नै सञ्चालन गरेर रकम जुटाएको थियो ।
![](https://sajhamanch.com/wp-content/uploads/2024/05/sahabhagi-11-300x138.jpg)
त्यस्तै, सोही कार्यक्रममा जिल्ला सहकारी संघ झापाले छात्रवृत्ति कोषको घोषणा गरेको छ । एक करोड रुपैयाँको कोष स्थापना गर्ने उद्देश्यले उक्त कोषको घोषणा गरिएको हो ।
कोषका लागि संघका अध्यक्ष गणेश ढकाल र वरिष्ठ उपाध्यक्ष महेन्द्रकुमार गिरीले एक/एक लाख तथा सचिव भवानीप्रसाद दंगालले ५० हजार रुपैयाँ प्रदान गरेका छन् ।
सो कार्यक्रममा झापाली समाज साउदी अरेबियाका तर्फबाट संस्थापक अध्यक्ष मदन ओडारीले झापाली समाज अमेरिकाका संस्थापक अध्यक्ष मुकुन्द ढुंगानालाई छात्रवृत्ति कार्यक्रमका लागि ५ लाख रुपैयाँको चेक हस्तान्तरण गरेका थिए ।
जिल्ला सहकारी संघ झापा मार्फत जिल्लाका २२ वटा सहकारीले छात्रवृत्ति अभियानलाई सहयोग गरेका छन् । झापाका सबै क्षेत्र समेटिने गरी सामुदायिक विद्यालयहरु छनोट गरिएको कार्यक्रममा जनाइयो ।
![](https://sajhamanch.com/wp-content/uploads/2024/05/sahabhagi-22-300x181.jpg)
यसैबीच, उक्त कार्यक्रममा झापाली समाज अमेरिकाले कनकाई नगरपालिकालाई शव वाहनको चाबी हस्तान्तरण गरेको छ ।
झापाली समाज अमेरिकाको पहलमा रकम संकलन गरी शव वाहन खरिद गर्न रकम पठाइएको थियो । सो कार्यक्रममा प्रमुख अतिथि विक, झापा विकास मञ्चका डाक्टर आनन्द श्रेष्ठ, कनकाई नगरप्रमुख राजेन्द्रकुमार पोखरेल लगायतले शुभकामना मन्तव्य राखेका थिए ।
संघका अध्यक्ष गणेश ढकालको अध्यक्षतामा सम्पन्न उक्त कार्यक्रममा शाब्दिक स्वागत संघका वरिष्ठ उपाध्यक्ष महेन्द्रकुमार गिरी र सञ्चालन सचिव भवानीप्रसाद दंगालले गरेका थिए ।