कतै कुकर बम, कतै छुरा प्रहार, असुरक्षित बन्दै बिर्तामोड, प्रहरी रमिते

बिर्तामोड । झापा अर्जुनधारा ६ को महानन्द चोकमा युवकद्वारा छुरा प्रहार गरी हत्या गरिएकी युवतीको पहिचान खुलेको छ ।

हत्या गरिएकी युवती अन्दाजी १९ वर्षकी इलाम फिक्कलकी मनिशा लोहार भएको खुलेको हो । उनी हाल बिर्तामोड नगरपालिका ५ पाथिभरा टोलमा डेरा गरी बस्दै आएकी थिइन् । । त्यस्तै उनलाई छुरा प्रहार गर्ने युवक कैलाली गौरीगंगा नगरपालिका वडा नम्बर-३ बस्ने अन्दाजी २० वर्षका अनिल विक भएको बुझिएको छ । छुरा प्रहारबाट घाइते युवतीलाई उपचारका लागि बीएण्डसी अस्पताल पठाइएकोमा उपचारका क्रममा साँझ ७ बजे उनको मृत्यु भएको हो । उनको घाँटी, छाती र कोखामा छुरा लागेको थियो ।

छुरा प्रहार गर्ने विक पनि घाइते छन् । उनलाई उपचारको लागि बिर्तासिटी अस्पताल भर्ना गरिएको छ । छुरा प्रहार गर्ने विकलाई स्थानीयले प्रतिकार गर्दा उनी घाइते भएका हुन् । घटनाको सम्बन्धमा अनुसन्धान भइरहेको इलाका प्रहरी कार्यालय बिर्तामोडका डीएसपी प्रकाश विष्टले बताए । दुवैजना प्रेमी–प्रेमिका रहेको बुझिएको छ ।

चार दिनअघि केटीको विषयमा बिर्तामोडको किरात चोकमा दुई समूहबीच ग्याङ फाइट भएको थियो । झडपमा एकजना घाइते भएका थिए भने तीनजनालाई प्रहरीले पक्राउ गरेको थियो । यस किसिमका घटनाले बिर्तामोड असुरक्षित बन्दै गएको छ । बिर्तामोडका गल्लीगल्लीमा दिउसै लागुऔषध सेवन गरेर हल्ला गर्दै बस्ने युवाको संख्या बढेको छ । पछिल्लो समय बिर्तामोडमा असुरक्षित भएको छ तर, प्रहरी रमिते छ ।