कात्तिक १५ मा प्रदीप र पलको भिडन्त

गत जेठमा आएको ठूला ‘स्टार’का दुई फिल्म (पूजार सार्की र फर्की फर्की)को भिडन्तले ठूलै तरंग ल्याएको थियो । अब एकपटक फेरि दुई ‘स्टार’का फिल्म बक्स अफिसमा आमने-सामने हुने भएका छन् । ‘पूजार सार्की’मा एकसाथ काम गरेका प्रदीप खड्का र पल शाहको फिल्मबीच भिडन्त हुन लागेको हो । आगामी कात्तिक १५ गते (लक्ष्मीपूजा)मा उनीहरुका फिल्म भिड्न लागेका हुन् ।

प्रदीप अभिनीत फिल्म ‘एक्टर’को छायांकनमा नजाँदै लक्ष्मीपूजालाई प्रदर्शन मिति घोषणा गरिएको थियो । यसपछि यो मिति अरुले रोजेनन् । अब ‘एक्टर’सँग पल अभिनीत फिल्म ‘मायावी’ले बक्स अफिसमा प्रतिस्पर्धा गर्ने भएको छ । सम्भवतः बुधबार ‘फर्स्टलुक’ पोस्टर सार्वजनिक गर्दै कात्तिक १५ गतेलाई फिल्मको प्रदर्शन मिति घोषणा गर्ने तयारीमा निर्माण टिम रहेको स्रोतले जनाएको छ ।

‘एक्टर’ र ‘मायावी’को भिडन्तले फिल्म क्षेत्रमा ठूलो तरंग पैदा गराउने निश्चित छ । किनभने, दुवैमा ‘स्टार’ छन् । यो प्रदीप र पलको स्टारडम मापन गर्ने परीक्षा पनि हुनेछ । तिहारदेखि छठसम्म शनिबारसहित ६ वटा विदा भएकाले ‘मायावी’का निर्माताले रिलिजका लागि कात्तिक १५ उचित मिति ठानेको हुनुपर्छ । त्यसो त अहिले एउटा मितिमा दुईटा फिल्म नेपालका हलले सजिलै धान्न सक्छन् ।

‘मायावी’लाई दीवाकर भट्टराईले लेखन र निर्देशन गरेका हुन् । यसमा पलको जोडी भएर अभिनेत्री दीपिका प्रसाइँ देखिएकी छन् । निर्माताहरुमा राज कटुवाल, चन्द्र पन्त र ध्रुव न्यौपाने छन् । ‘एक्टर’का निर्देशक भने राजन भुसाल हुन् । यसमा प्रदीपसहित आना शर्मा, राजबल्लभ कोइलारा, दिव्या रायमाझी लगायतको अभिनय छ । ‘स्टारकास्ट’को हिसाबले दुवै फिल्म बलियो देखिएका छन् ।