शुक्रवार ४ बजेसम्म संस्थागत विद्यालय सञ्चालन गर्ने निर्णयको प्रतिवाद गर्ने

भद्रपुर । संस्थागत विद्यालय शिक्षक युनियन भद्रपुर नगर समितिले प्याब्सन/एन-प्याब्सनको नाममा शुक्रवार ४ बजेसम्म संस्थागत विद्यालय सञ्चालन गर्ने निर्णयको प्रतिवाद गर्ने भएको छ ।

नगर अध्यक्ष विदुर ढुङ्गाना तथा सचिव रमेश भट्टराईद्वारा जारी विज्ञप्तिमा जनाइए अनुसार राज्यको नियम विपरीत शुक्रवार १ बजेपछि संस्थागत विद्यालय बिदा नगरिए बहिस्कार गरेर विद्यालय छोड्ने निर्णय गरिएको हो । राज्यको नीति नियमभन्दा शक्तिशाली निकाय बन्न खोज्दै प्याब्सन एनप्याब्सनको आडमा आगामी दिनमा यस्ता गतिविधि संस्थागत विद्यालयहरूले बढाउँदै लगे कानुनी उपचारमा जाने समेत निर्णय भएको विज्ञप्तिमा जनाइएको छ ।

विज्ञप्तिमा भनिएको छ — विभिन्न बहाना बनाएर संस्थागत विद्यालयहरूले सङ्गठित रूपमा सार्वजनिक बिदा अतिक्रमण गर्ने, सरकारले तोकेको पारिश्रमिक नदिने, आधा दिनको बिदा मिचेर पूरै दिन काम लगाउने, हरेक वर्ष विद्यार्थीको अध्ययन शुल्क बढाउँदै जाने तर शिक्षक कर्मचारीको पारिश्रमिक बढाउन नमान्ने कार्यको संरक्षण प्याब्सन एनप्याब्सनले गर्ने गरेको कार्यशैलीप्रति आपत्ति प्रकट गर्दछौँ भनिएको छ ।

यस्तै प्याब्सन, एन प्याब्सनसित संस्थागत विद्यालय शिक्षक युनियनले गरेको सहमति विपरीत  संस्थागत विद्यालयहरूले शिक्षक कर्मचारीमाथि गरिरहेको शोषण अविलम्ब नरोके कडा प्रतिकारमा जाने समेत स्पष्ट पारिएको छ । भद्रपुरमा रहेका ३१ वटा संस्थागत विद्यालयहरू मध्ये अधिकांश विद्यालयले प्याब्सन एन प्याब्सनको निर्णय भन्दै सार्वजनिक बिदा अतिक्रमण गर्ने, तोकिएको न्यूनतम पारिश्रमिक नदिने, राज्यको नीति नियम विपरीत गतिविधि अगाडि बढाउने काम गरे पनि नियामक रमिते भइरहेको आरोप लाग्ने गरेको छ ।