|

कोशीको सभामुखमा राप्रपाका विष्ट निर्विरोध निर्वाचित

ad

झापा । कोशी प्रदेशसभाको सभामुखमा राष्ट्रिय प्रजातन्त्र पार्टी (राप्रपा) का अम्बरबहादुर विष्ट निर्विरोध निर्वाचित भएका छन् । मंगलबार सत्तारूढ गठबन्धन र प्रतिपक्षी दलको समर्थनमा राप्रपाका विष्ट सभामुखमा निर्वाचित भएका हुन् ।

प्रदेशसभामा आज भएको निर्वाचनमा अरूको उम्मेदवारी नपरेको भन्दै उपसभामुख सिर्जना दनुवारले विष्टलाई निर्वाचित घोषणा गरिन् । विष्टको प्रस्तावकमा भक्तिप्रसाद सिटौला र समर्थकमा प्रेमराज थाम्सुहाङ रहेका छन् ।

अब,विष्टले प्रदेश प्रमुख परशुराम खापुङबाट पद तथा गोपनीयताको शपथ ग्रहण गर्ने छन् । विष्ट गत निर्वाचनमा समानुपातिकतर्फ प्रदेशसभामा निर्वाचित भएका थिए । झापाको गौरादह नगरपालिका-७का बासिन्दा ७० वर्षीय विष्ट संघीयता र गणतन्त्रका प्रखर विरोधी मानिन्छन् ।

तर,नेकपा एमाले,नेपाली कांग्रेस,नेकपा माओवादी केन्द्र,एकीकृत समाजवादी र जसपा गरी सबै गणतन्त्रवादी दलहरूको समर्थनमा कोशी प्रदेशको सभामुख बनेका हुन् ।

गत साउन १६ तत्कालीन सभामुख बाबुराम गौतमले राजीनामा दिएर कांग्रेस संसदीय दलका नेता उद्धव थापालाई मुख्यमन्त्री बनाउन सघाएयता कोशीमा सभामुख पद रिक्त थियो । गत वर्षको पुस २८ गते निर्विरोध निर्वाचित सभामुख गौतमले राजीनामा दिँदै आर्थिक मामिला तथा योजना मन्त्रालय रोजेका थिए ।

को हुन् सभामुख विष्ट ?

२०१० सालमा जन्मिएका विष्ट विद्यार्थी कालमा २०२७ सालमा अनेरास्ववियुमा आबद्ध भएका थिए । उनी विराटनगरको महेन्द्र मोरङ क्याम्पस अध्ययन गर्दा २०२८ सालमा अखिलको इकाई उपसभापतिमा उम्मेदवारसमेत बनेका थिए । अखिलकै राजनीतिमा सक्रिय रहेका उनी २०३२ सालमा भने पञ्चायतको समर्थक बने ।

२०३३ सालमा जुरेपानी गाउँ पञ्चायत वडा नम्बर ५ को वडाध्यक्ष निर्वाचित भएका विष्ट त्यसको एक वर्षपछि सोही गाउँ पञ्चायतको उपप्रधानपञ्च भए । उपप्रधापञ्चपछि उनी १० वर्ष जिल्ला पञ्चायतको उपसभामपति रहे । बहुदलीय व्यवस्थाको स्थापनापछि खुलेको पूर्वपञ्चहरुको पार्टी राप्रपामा सक्रिय रहेका विष्टलाई राप्रपासहितको सरकारको नेतृत्व गरेका तत्कालीन प्रधानमन्त्री शेरबहादुर देउवाले सहकारी विकास बोर्डको सदस्यसचिवमा पनि नियुक्त गरेका थिए । उनी राप्रपाको जिल्ला सचिव र अध्यक्ष हुँदै हाल केन्द्रीय सदस्य रहेका छन् । अन्नपूर्ण पोष्टबाट

Similar Posts